Ilu ftit, tfajla kitbitli u qaltli : " Sister, kemm inħossni fil-paċi u ferħana, issa li erġajt sibt lil Ġesu’ !" Saħħaħt aktar il-fehma tiegħi x’ ħin qrajt dan, kemm hu minnu li la l-karriera , la s-sess,
la l-flus u lanqas id-droga, ma jissodisfaw il-qalb tal-bniedem. X’vojt iħallu wara ftit minuti ta’ pjaċir fieragħ li jgħaddi u jispiċċa.
Kompliet tgħidtli : "Issa li sibt lil Ġesu’ qatt aktar ma’ nħallih." Meta qrajt dal-kliem, dak il-ħin stess ftakart fl-episodju ta’ meta l-ewwel erba’ appostli, dixxipli ta’ Ġwanni l-Battista, sabu lil Ġesu’ ta’ Nażareth. X’ħin semgħu lil Ġwanni l-Battista’ jgħid ; " Araw il-}aruf t’Alla " – il-Messija li kienu ilhom jistennew – tant ferħu, li dak il-ħin stess, telqu lil Ġwanni l-Battista u mxew wara Ġesu’ biex jaraw fejn kien jogħqod. Ġesu’ rahom mexjin warajh u staqsihom " Xi tridu?"
"Fejn togħqod Rabbi?" staqsewh.
“Ejjew u taraw" weġibhom.
Żgur li kellhom dispożizzjoni tajba, tant li band’oħra, f’San Mark, Kap 1. vers 16 – 20. juża l-kelma " u minnufih telqgħu x-xbiek u marru warajh". "Minnufih" tfisser ħafna, – li ma’ qagħdux jaħsbuha darbtejn li jħallu lil missierhom, il-familja, is-sigurta’ ta’ l-għajxin tagħhom. Ġesu’ kien ġa serqilhom qalbhom f’dik il-ġurnata li kienu għamlu miegħu, wara li kienu marru jaraw fejn kien jogħqod. Issa għalihom l-aktar li kien importanti f’ħajjithom, kien sar Ġesu’.
Min jaf! Tista’ tkun kelma ta’ ħabib sinċier, ħarsa jew tbissima, jew fatt bħal dan li jdaħħlek f’relazzjoni intima’ ma’ Ġesu’. Id-dinja tallum għandha ħafna x’ toffri biex taljena lil bniedem, speċjalment liż-żgħażagħ, li bħal blanzun ta’ warda friska, ikun se jiftaħ biex juri l-ġmiel tagħha. U lil minn jixraq il-ġmiel tal-warda, jekk mhux lil Alla li ħalaqha?. Fiż-żmien tallum, nisimgħu bi tfajliet u ġuvenur li joffru lil Alla sentejn jew ftit aktar minn hajjiethom bħala Missjunarji lajċi. Dan hu ħsieb qaddis u ta’ minn jinkorraġġih. Iżda kemm hu aktar nobbli u qaddis, li tfajla jew ġuvni jagħtu ħajjithom kompletament lil Alla, hekk li jsiru Proprjeta’ Assoluta tiegħu ?!
Kif il-ħajja taż-żwieg hi sabiħa u meħtieġa, biex tiġġenera l-ħajja fuq il-Kmand ta’ Alla, daqstant ieħor, il-ħajja Reliġjuża – li qatt m’hi se tispiċċa – hi sabiħa u dejjem awtentika għax ġejja minn Alla. Il-Mulej żgur li għadu jsejjaħ. Il-gwaj hu, li d-dinja qiegħda turi kollox sabiħ f’ ħolm li ma’ fihx ħlief illużżjoni u falsita’ biex tnissi il-verita’ waħdanija— li Alla biss jimla l-qalb tal-bniedem.
Għandna eżempju konkret ta’ Santa Tereżina tal-Bambin Ġesu’. Tfajla ta’ 15 il-sena, timida imma ta’ qalb kbira li iġġennet għal wara Ġesu’, tant li ħalliet kollox, fostom lil għażiż missierha li tant kienet tħobb u lil ħutha, biex tidħol fil-Karmelu Tereżjan ħalli tgħix ħajja moħbija ta’ mħabba, talb, u sagrifiċċju biex issalva ħafna erwieħ. F’għajnejn id-dinja dan żgur deher ġenn, tfajla moħlija, frustrata, imma ħafna jafu bit-tweġiba li tana Alla biha. Saħansitra il-Knisja, għamlitha Patruna tal – Missjonijiet, meta qatt ma ħarġet mill-Klawsura.
Nies imdejqa fid-dinja hawn kemm trid, avolja jgħidu li ma jonqoshom xejn, għax għandhom kollox. Aħna bil-kuntralju ta’ dak li taħseb fuqna id-dinja, aħna l-aktar nies ixxurtjati, għax bħal l-appostli sibna it-teżor prezzjuż, lil Ġesu’ Kristu, li kuljum issaħħarna mis-sbuħija u l-imħabba ġenwina Tiegħu. }allejna kollox, għax sibna ‘l Kollox.
Inti tfajla li qiegħda tfittex fejn tinsab il-vera paċi u il-ferħ ġenwin, nistiednek biex tagħmel kuraġġ waqt li twarrab kull tħassib u biża’ tal-Klawsura, u tasal wasla sa għandna f’Bormla. Ġimgħa jew aktar ta’ esperjenza bejn l-erba’ ħitan imbierka tal-Karmelu, żgur li jagħtuk dak li qalbek ilha tixtieq u tfittex. Dan qiegħda ngħidulek mill-esperjenza tiegħi. Li tiltaqa’ ma’ Alla li jħobbok tassew hija avventura ta’ ferh kbir, li tissorprendik għal ħajtek kollha. Għal daqstant imħabba, għax Hu ħabbek l – ewwel, x’ jimporta li tgħaddi ħajtek ma’ Alla fil-Klawsura Tereżjana??
Nagħlaq bi ħsieb ta’Santa Tereżina tal-Bambin Gesu’ fejn tgħidielna: "Meta qalb tħobb, din tagħti bla ma’ tqis"
(Sr.Celina) – April 2003.
